Çin Xalq Respubikası - Pekin

   Dünyanın ən qədim mədəniyyətlərindən birinə sahib olan, barıt, kompas, kağız, mətbəə kimi önəmli ixtiraların kəşf edildiyi ölkə- Çin Xalq Respublikası.

   Tarix kitablarının səhifələrini vərəqləsək Çin haqqında qarşımıza yüzlərlə illik tarix və Çin fəlsəfəsi çıxır. 5000 illik möhtəşəm tarixi təcrübəyə malik olan Çin bu xüsusiyyəti ilə dünya tarixinin demək olar ki bütün dövrlərində varlığını qoruyub saxlamışdır.

   Dünyanın ən çox əhalisinə sahib olan Çin həmçinin sahəsiylə ən böyük Asya ölkələrindən biridir. Sahəsinin böyüklüyü ölkənin fərqli bölgələrində müxtəlif  iqlim növlərinin olmasına şərait yaradır.

  Ölkənin rəsmi dili çin dili olsa da, qeyri-rəsmi olaraq 292 dil danışılır.  Çin əhalisinin 80 faizi Çin dinlərinə inanır.Yerdə qalan hissəsi isə budist, xristyan və ya ateistdir.

   Çin son illərdə dünyanın ən vacib iqtisadi güclərindən birinə çevrilməyə başlamışdır. Çinin regionda və dünyada nüfuzu, hərbi sahədən çox iqtisadi sahədə özünü hiss etdirməkdədir. Turizm baxımından önəmli iqtisadiyyata malik olan Çin, Fransa və ABŞ-dan sonra dünyada ən çox ziyarət edilən üçüncü ölkədir.

   Çin Xalq Respublikasının paytaxtı Pekin, Şanxaydan sonra ölkənin ən çox əhalisi olan şəhərdir. Pekin yüz illər boyunca Çinin dəyişməz paytaxtı olmuşdur və bu sayədə dünyanın ən qədim paytaxtlarından biri hesab olunur. Ölkənin ən önəmli tarixi dəyərlərinə ev sahibliyi edən Pekin, hər il yüz minlərlə ziyarətçi qəbul edir.

  

" Qadağan olunmuş şəhər "

  

     

    İmperatorluq dövründən qalan, ən görkəmli tikililərdən biri sayılan "Qadanğan olunmuş şəhər "  dünyaca məşhur nadir əsərlərdən biri olaraq qəbul olunur. 6 əsirlik tarixi olan tikili günümüzə qədər gəlib çatmış ən böyük taxta tikililərdəndir.

   Təxminən 600 il boyunca 24 hökümdara ev sahibliyi edən şəhərin "Qadağan olunmuş" olaraq adlandırılmasının səbəbi dövrün hökümdarlarını qorumaq üçün alınan yüksək səviyyəli təhlükəsizlik tədbirlərindən qaynaqlanır. Belə ki, şəhərin ətrafı eni 50 metr olan su kanalları ilə əhatə olunur və şəhərə giriş və çıxış qapılardan başqa heç bir torpaq parçası ilə mümkün olmur. Bir digər təhlükəsizlik tədbiri isə  şəhərin bünövrəsini əhatə edən  bir neçə metrlik daş bloklardır.Beləliklə şəhərə torpağın altından qazaraq girmək səyləri də uğursuz nəticələnir. Şəhərdə hökümdarların hər gün ayrı otaqlarda qalmağı təmin edilirdi, belə ki hökümdarlar üçün  9999 otaq tikilmişdir və hökümdarın hansı gün hansı otaqda gecələdiyini yaxın mühafizəçilərindən başqa heç kim bilmirdi.  

   
   Qadağan olunmuş şəhərdə əsas təsvir, Çinin simvoluna çevrilmiş əjdaha təsviridir. Güc simvolu olan əjdaha təsvirinin şəhərdəki sayı dəqiq bilinmir. Çünki su kanallarından, mərmər bəzəklərə qədər saysız-hesabsız əjdaha təsvirlərini müşahidə etmək olar.

  Hökümdar, kraliça, dövlət məmurunun rütbəsi qaldığı binanın damındakı fiqurların sayı ilə müəyyən olunur. Hökümdarın qaldığı binanın damında 10 heyvan fiquru təsvir olunur. Şəhərdəki binalarda bu fiqurların sayı dövlət məmurlarının rütbələrinə görə daha da azalır.

    Qadağan olunmuş şəhər  ön və arxa bağça olaraq iki hissəyə bölünür. Şəhərin əsas giriş qapısı   "Meridyan qapısı" adlanır. Bu qapıdan keçdikdən sonra şəhərin içində ikinci bir qapı - "Böyük harmoniya qapısı"  qarşınıza çıxır. Bu qapının arxasında isə  Çin memarlığının möhtəşəm əsərlərindən olan  üç böyük saray sizi qarşılayır.

   "Böyük Harmoniya sarayı"

  İmperatorun taxt sarayı olaraq bilinən bu saray digərlrində öz əzəməti ilə seçilir. Sarayın içində imperatorun əjdaha detallı taxtı yerləşir. Yeni ili qarşılama və taxta çıxma mərasimləri həmişə burada edilirdi.

   " Mükəmməl Harmoniya sarayı" 
  
  Bu saray bir qədər kiçikdir və bəzi rəsmi olmayan tədbirlər burada keçirilirdi.

    "Harmoniyanın Qorunması sarayı"

  Dünyanın ilk dövlət xidməti imtahanları məhz burada keçirilmişdir.

   1987-ci il istehsalı olan, Bernardo Bertoluççi imzalı  "Son imperator " filmi Çin hökumətinin icazəsi ilə Qadağan olunmuş sarayda çəkilən ilk bədii filmdir. Film Çinin sonuncu imperatoru olan 3 yaşlı Pu İnin həyatından bəhs edən bioqrafik,tarixi dram filmidir.
  

  Tiananmen Meydanı

  
    Tiananmen  meydanı şəhərin tam ortasında yerləşir. Dünyanın ən böyük şəhər meydanlarından biri hesab olunur. 40 hektarlıq bu ərazidə memarlıq işi baxımından xüsusi bir şey yoxdur.Meydanın cənub hissəsində Mao Zadonqun (Çin Xalq Respublikasının qurucusu) mavzoleyi yerləşir. Meydanın şimalında Xalq Qəhrəmanlarının xatirəsinə salınmış abidə ucalır. Meydanın qərb hissəsində saray və milli teatr binası var. Meydanın şərqində isə  Çin milli muzeyi ziyarətçilərini qəbul edir. Muzey iki hissədən ibarətdir : Tarix muzeyi və inqilab muzeyi. Muzeyə giriş ödənişlidir. Lakin turistlər üçün  tək problem  sərgilənən materialların yalnız çin dilində olmasıdır. 



Cənnət məbədi

   Cənnət məbədi Pekinin simvollarından biridir. Çində o dövrlərdə cənnətin dairəvi, dünyanın isə kvadrat şəklində olduğuna inanılırdı və bu inanca görə şimal hissə dairəvi, cənub hissə isə kvadrat formasında inşa edilib. Binanın inşasında heç bir mismar və metaldan istifadə olunmaması Minq və  Qinq memarlıq sənətinin ən gözəl nümunəsi kimi göstərilməsinə səbəb olub.
   İmperator məhsul biçini dövründə məhsulun bol olması üçün burada dua edər və insanlar bu məbəddə cənnətə qurban olaraq təqdim edilərmiş.

   Bağçasından tavanlarına qədər hər bir detalı xüsusi diqqətlə bəzədilmiş məbəd, ahəngli rəngləri və divarlarındakı işləmələri ilə göz oxşayır.Məbədə doğru yeridikdə üstü qapalı uzun bir yoldan keçirsiniz.Bağça boyu müxtəlif kağız və daş oyunları oynayan, idmanla məşğul olan,rəqs edən  yerli sakinləri də görmək olar.


   Beijing heyvanxanası və Pandalar

    Əgər Pekində keçirəcəyiniz əlavə bir neçə gününüz varsa , Beijing heyvanxanasına baş çəkməyi unutmayın.1906-cı ildə Qinq sülaləsi tərəfindən qurulmuş Beijing heyvanxanası dünyanın ən köhnə və məşhur heyvanxanalarından biridir.Tərkibində 950 fərqli növdən  14500 heyvan olan heyvanxanada ən çox rəğbət görən və məşhur olan heyvan isə pandalardır. 

 

  Vangfujing küçəsi

      Dünya şöhrətli markaların mağazalarının yerləşdiyi bu küçə turistlərin ən çox baş çəkdiyi küçələrdən biridir.Lakin turistlər Vagfujing küçəsinə əsasən alış-veriş üçün yox, küçə boyu  düzülmüş restoranlarda Çin mətbəxinin fərqli təamlarını dadmaq üçün üz tuturlar. Əgər ürəkli olsanız burada bir-birindən maraqlı və qeyri-adi sayılan  əqrəb qızartması,osminoqları və s.kimi yeməkləri sınaqdan keçirə bilərsiniz .Yox əgər o qədər də macəra həvəskarı deyilsinizsə xüsusilə yemək üçün yetişdirilən   pekin ördəyinin dadına baxmağı unutmayın.

Olimpos-Gizli Cənnət I Hissə

    Qarşıdan yay gəlir və artıq indidən yayı harda necə keçirməklə bağlı araştırmalara başlamaq vaxtıdır :) Axtarışlarınıza  bir variant da mən əlavə etmək istəyirəm bəlkə köməklik edə bildim.Haqqında danışmaq istədiyim yer isə Olimposdur.

    Möhtəşəm təbii gözəllikləri,tarixi və plajı ilə Antalyada mütləq görülməli yerlərdən biri- Olimpos Kemerdən hardasa 25-28 km qərbdə yerləşən antik Likiya şəhəridir.E.ə 300 ildə inşa edilib.Bugünə qədər də qalıntıları qalmaqdadır.Sahildən dənizə qədərki ərazidə açıq hava muzeyi var.Təsəvvür edin dənizə muzeyin içindən keçərək gedirsiniz.

Olimpos harabeleri

   Olympos sözünün mənası köhnə yunan dilində " ulu dağ " deməkdir.Likiya bölgəsinin ən böyük şəhəri olub və adı əvvəllər olympos dağı olan "Tahtalı Dağ"dan gəlirmiş.Bu dağ şəhərin 10 km şimalında yerləşir və dağın ətəyində bügünkü gündə  "Yanartaş" adıyla bilinən heç sönməyən alovlar qalxır.Turistlər üçün turlar təşkil olunur  amma dağın alovlar çıxan hissəsinə gedib çatmaq bir qədər yorucudur.Təbiliyini qorumaq üçün normal pilləkən və ya qalxmağa kömək edəcək birşey yoxdur .Dağ ətəyi alovdan dolayı isti olduğundan əqrəblər də olduqca çoxdur.Lakin gəlib o yüksəkliyə çatanda ,ulduzlarla dolu olan səmanın və alovun birikdə ahəngli görüntüsü bir qədər yorğunluğu unutdurur.Ulduzlar deyirəm çünki turlar məhz  bu görüntü üçün  axşam təşkil olunur.Lakin qalxdığımız o qədər məsafəni bir daha geri qayıtmaq qalxmağımıza dəyərdi mi deyə sual yaradır.  

  Olympos liman şəhər olduğu üçün   III əsrdə piratların nəzarətində olub və tez tez hücumlara məruz qalıb.Bu səbəbdən şəhər yoxsullaşıb və  nüfuzu azalıb. XV əsrdə Osmanlı dövründə quldurlar şəhəri tərk edib.

   

     İndi isə  necə getdik,harda qaldıq , bilet,hotel rezervasiyası, airportdan hotele transport və s. haqqında danışacam.
    


     Biz yay tətilini  həm dəniz olsun,həm gəzək ,təbiətin içində olaq,həm də aktiv istrahət keçirək,günümüzü oteldə keçirməyək  deyə planlaşdırdıq.Və yoldaşım Olimposu tapdı :) Növbəti etap  harada qalacağımız idi.
   Olimpos  tarixi önəm daşıdığı üçün bu ərazidə  tikinti qadağandır.Buna görə də Olimpos öz ağac evləri ilə məşhurdur.

    Lakin ağac evləri seçərkən təmizlik olsun,qurd-böcək olmasın  və s. kimi titzlikləriniz varsa diqqətli olun seçəcəyiniz pansiyon otellerin tripadvisor və s. kimi yerlərdə şərhlərini oxuyun.Ağac evləri olduğu üçün bəzən təmizlik problemi ola bilir. Məhz bu səbəbdən işimizi şansa buraxmaq istəmədik (daha doğrusu mən :) çünki yoldaşımın və əksər oğlanların harda qalmaqları ilə bağlı problemləri olmur :) ) və sahilə 2 km uzaqlıqda şirin bir butik hotel tapdıq.2 nəfərlik otaq gündə iki dəfə yeməklə birlikdə təxmini 100 azn idi.Online otelimizi bron etdik.Ucus biletini isə olduqca ucuz almışdıq indi yadımda deyil :) Bakı-İstanbul-Antalya və geriyə.Bir məsələ var idi.Antalya hava limanından Olimposa necə getmək? Avtovağzala gedib ordan saatbaşı çıxan avtobuslarla getmək olar və ya taksilər də bir qədər baha qiymətə sizi mənzil başına çatdırar.Biz daha tez və münasib olanı seçdik :) Otelin servisi  münasib qiymətə bizi qarşılayıb otelimizə gətirdi.Bizi gətirən dayı söhbət etməyi olduqca  sevirdi.Olimposa çatmamıs artıq haqqında o qədər gözəl şeylər danışdı ki seçimimizdə yanılmadığımıza inandıq :)
   

    Qaldığımız yer çox gözəl idi.Balaca amma rahat,təmiz,mehriban kollektiv.Otelin sahibi hər axşam balıqları özü bişirir və gəzib bir bir stollarla maraqlanıb, dadlı bişirib bişirmədiyini soruşurdu.Yeməkdən sonra isə ya canlı musiqi dinləmək ya da açıq havada film izləmək imkanı da var idi.Bizsə axşamlar əsasən türk tavlasında azərbaycansayağı nərd oynayırdıq :)

    

           
     2ci hissədə Olimposda gəziləcək yerlərdən,turlardan, Batık şehirden danışacağam .Ümid edirəm bəyənərək oxuyacaqsınız.Bol səyahətli günlər dostlar :)

Almaniya Sərgüzəştləri Part 1

      Səyahətdə vəya başlamazdan əvvəl bir çox səhvlər edirik.Planlama ilə  bağlı,səyahət edəcəyimiz ölkə haqqında düzgün məlumatlanmaqla bağlı ,hava şəraitini gedəcəyimiz dövrdə düzgün dəyərləndirməməklə bağlı  və s. Bir də bu var: özünlə "yaxşıca  qənaət etdim " deyərək fəxrlə aldığın bilet ,otel rezervasiyası çox vaxt səni düşündüyün kimi qabağa salmır.Əksinə  olduqca çətin anlar yaşadır .İndi isə bu minvalda başımıza gələn hadisələrdən birini yazmaq istəyirəm.


      Elə isə başladıq :) Başlıq isə belədir-Ucuzdur deyə şəhər mərkəzindən uzaqda tutulan hostel. 

    " Plan sadədir: düşən kimi qaçmaq "

       Deməli 2017nin avqustunun sonlarında yaydan planlaşdırıb öncədən xəritəsini cızdığımız,bilet və qalacaq yerlər rezervasiya etdiyimiz 25 günlük avropa turuna çıxdıq.Başlayacağımız ölkə Almaniya idi.İlk şəhərimiz də təbii ki Berlin.Planımız Almaniyanin bir-iki şəhərini gəzib növbəti ölkələrə keçmək idi.Polşada yaşadığımız üçün elə yaxındır deyib avtobusla yollandıq Berlinə.Airbnb aplikasiyasını yeni keşf etdiyimiz səyahətimiz idi.Elə qalacağımız yerləri onun vasitəsiylə seçmişdik.Yeri gəlmişkən məncə əla aplikasiyadır.Xülasə gəlib çatdıq Berlinə-Avtovağzala.Elə ilk düşən kimi bir azərbaycanlı görüb yerli kimi salamlaşdıq :) Xəritəmizi açdıq və avtovağzaldan qalacağımız yerə yarımsaatlıq məsafəni necə və hardan gedəcəyimizə baxdıq.Yaxınlıqda dəmiryolu stansiyası var idi..Elə ən yaxşı variant da qatar olduğu üçün fikirləşmədik və stansiyaya girdik.Hardan hansı qatarın hara getdiyini dəqiqləşdirmək çətindir çünki   ilk gün üçün Almaniyada dəmiryolu şəbəkəsi olduqca qarışıqdır.Stanisyada dəmiryolu xəritəsindən gedəcəyimiz dayanacağın adını axtarirdiq.Kənardan  çiynində turist sumkası ilə transport xəttinə bələd olmadığımız görünmüş olmalıdır ki biri bizə yaxınlaşdı və həddindən artıq səmimiyyətlə hara getməli olduğumuz soruşdu  və çox rahatlıqla hansı qatara minməli olduğumuzu deyib böyük gülümsəmə ilə yanımızdan ayrıldı.Adam gəlib bizə yol göstərənə qədərki vaxtda xəritədə təxmini hardan gedəcəyimizi aşkarlamışdıq.Amma adamın bizə dediyi istiqamət tamamilə fərqli idi.Yoldaşım dedi ki  içimdəki mükəmməl yön hissim bizim haqlı olduğumuzu,adamın mənasız səmimi olduğunu  və  bizi aldatdığını, yanlış istiqamətləndirdiyini deyir.1-2 dəqiqəlik diskussiyadan sonra öz seçdiyimiz qatara mindik..Adam bizə səhv yol göstərmişdi.İndiyə  kimi hələ də başa düşməmişəm adamın məqsədi nə idi.Bu arada gedəcəyimiz yer üçün 2 qatar dəyişməli idik. Nə isə nəhayət gəldik çatdıq lazım olan stansiyaya.Sən demə burdan qalacağımız hostelə 15 dəqiqəlik yerimə  məsafəsi var. Bu 15 dəqiqəlik məsafəni unutmayaq hərşey bunla başlayacaq :) 

      Avqusta görə hava olduqca " sərin " idi.Qaldığımız otaq iki nəfərlik idi.Amma otaq haqqında danışmaq istəmirəm.Yadıma düşdükcə stres keçirirəm :) Onu deyə bilərəm ki o "sərin " havada çöldə yatsaq daha isti olardı  :)
      3 gün Berlində olduq.Olduqca gözəl şəhərdir.Berlinerdoma aşiq oldum.Möhtəşəm idi.Amma Berlin haqqında yazmayacağam. bu haqda daha sonra geniş bir post paylaşacağam.

    Berlindən sonraki gedəcəyimiz şəhər Hamburg idi.Biletimiz səhər saat 8 ya da 9a idi  tam yadımda deyil.Həmin avtovağzala gedəcəkdik.Axşamdan 30-40 dəqiqə tez çatsaq rahat olar deyərək çıxmaq saatımızı dəqiqləşdirdik.Həm yerimə məsafəsinin 15 dəqiqə olmağını hesablamadıq həm də baş verən hadisənin ola biləcəyini :) Səhər rahatca stansiyamıza gəldik.( Bu arada Berlində  stansiyalar olduqca maraqlı idi .Bir neçəsi mənə  Harry Potter filmindəki stansiyanı xatırlatdı. ) Çatan kimi qatar gəldi gözləmədiyimiz üçün çox sevindik çünki qatarlar 10 dəqiqə arayla gəlir.Minidikdən 2 dəq sonra yoldaşımın üzündəki şok və həyəcanla mənə baxıb  " bilet almadıq " deməsiylə sevinc filan qalmadı :)  .Almadığımız yadımıza düşməzdi əgər hər iki tərəfdən gələn bilet yoxlayanları görməsəydik. İçəridə bilet almaq üçün avtomat da yoxdur.Olsa belə böyük ehtimalla bağlamış olurlar.Fikirləşdim aradan astaca arxaya keçək ama hara belimizdə dağ boyda sumkalarımızla birinci biz görünürük :) Dedim iki ayrı istiqamətə gedək.Çətini birini tutana qədərdir sonra heçkimi yoxlamırlar.Yoldaşım deyir yox e yox qanunu çeynəmişəm ödəməliyəm.Beni bırak sen git :)Gördüm tərpənmir sakitcə bəxtdən adamlar görmədən keçdim arxa qapıya .Və bu sırada uzaqdan adamların yoldaşımı necə əhatəyə aldığını müşahidə edirəm :)Tez tərpənmiş oldum.İki nəfərin cərimələnməsindənsə bir nəfəri qurban verməli olduq :) Cəriməsi səhv etmirəmsə 60 ya da 80 euro idi .Kefimizi pozmamağa çalışırıq çünki qarşıda hələ gəziləcək yerlər və 20 günümüz var.Qatardan düşdük və ikinci qatara minməliyik.Eyni hadisəni yaşamamaq üçün bilet alaq dedik.Konsert indi başlayacaq.Bilet avtomatlari işləmir ya səhər olduğu üçün idi ya da başqa səbəbdən idi.Tapdıqlarımız da kartla işləmir  və yalnız qəpik pul götürür .Üstümüzdə də kifayət qədər qəpik yoxdur.Avtobusun çıxmağına yarım saat qalır.Gedəcəyimiz stansiya sayısı 12 . Birtəhər bilet alıb mindik qatara.hər stansiyaya 2 dəqiqəyə çatsa 6 dəq qalır.Avtovağzalla dəmiryolu stansiyası arasındakı məsafə 400-500 metrdir.Plan sadədir: düşən kimi qaçmaq :) Amma nə deyib  Jhon Lennon həyat sən planlar qurarkən başına gələnlərdir. Nəisə biz stansiyamıza çatanda artıq 2 dəq qalmışdı.Qatar dayanan kimi özümüzü sürətlə çölə atdıq və belimizdəki ağır sumka ilə həyatımızım qaçışını gerçəkləçdirdik.Elə qaçaraq yolu keçəndə bir flixbus gördük ki avtovağzaldan çıxır çox  doğma göründü.ama hələ1 dəqiqəmiz var idi.Gəldik çatdıq ki avtobus yoxdur.Çıxan elə bizimki imiş.Daha ne etmək olar deyib 2-3 qat bahasın yarım saat sonra  gedən avtobusa biletimizi alıb Hamburga yola düşdük. 

     Sözümün canı həqiqətən ucuz olsun deyə etdiyimiz şeylər əksərən əlimizdə partlayır :) Məsəldə deyildiyi kimi astarı üzündən baha çıxır.Hələ növbəti postumda Almaniyadan İtaliya yenə qənaət edək deyerəkdən aldığımız bilet və hava limanına hansı zülümlərlə getməyimizdən və eyni minvalla İtalyadaki macəradan danışacam.Ancaq bunlar hamısı bizə təcrübə oldu artıq daha ağılla qərarlar verərək səyahət edirik.

     

   

     Uzun yazi oldu bilirəm .Ümid edirəm oxumaq  maraqlı olar.Bol səyahətli günlər dostlar  :)

Uzun Bir Aradan Sonra...Salam

       Uzun bir aradan sonra-Salam.

       Deməli belə hardan başlamaq lazımdır onu da qərarlaşdırmamışam.Komputerin qarşısına keçərəm çətini başlamaqdır prinsipi ilə davam edirəm :)

 
       Səhv etmirəmsə sonuncu yazımı 2 il əvvəl yazmışam.Bu qədər uzun müddətlik ayrılacağımı düşünmürdüm amma yazılarım arasındakı məsafənin getdikcə uzamasının buna gətirib çıxaracağı bəlli idi. Nəsə mövzuya biraz depressiv başladım hərçənd daha müsbət əhvali ruhiyyə ilə başlamağı planlaşdırırdım :) Çox güman ki etdiyim məsuliyyətsizlik ya da sevdiyim bir şeyə qarşı laqeyidliyimdən dolayıdır.


   2 il müddətində bəzi yeniliklər baş verdi.Həyatımı yeni bir ailəyə, yeni bir ölkəyə daşıdım.

     Yəqin çoxlarında olur bəzən məşğul olmaqdan həzz aldığın şeylərdən bir müddət məşğul ola bilməmək və s.Depressiya olduğunu düşünmürəm  özünü inkişafla bağlıdır,bəlkə də zamanla ... Belə bir söz var "həyatdan aldığın həzz marağın qədərdir". Əsas odur maraq dairəmiz geniş olsun :)

   Bu 2 illik aradan sonra bloga yenidən  başlamağa qərar verməkdəki ən əsas səbəbim yeni həyata,ölkəyə alışma prosesimi və bu prosesin necə getdiyini , yeni mövzularımı ,təcrübələrimi bir yerlərdə qeyd etmək,bölüşmək ehtiyacıdır.Bu müddət ərzindəki boş zamanlarımda bir çox şeyi nəzərdən keçirdim.Bir çox film ( :) ) izlədim,musiqi dinlədim, gəzdim, təcrübə yaşadım . Və artıq blogumdayam :)Blogda bir qədər dəyişiklik etmək haqqında düşünürəm.Mövzulari biraz genişləndirib  foto və səyahət,və əlbəttə fimlər ,musiqilər qısası hərşey haqqında hərşey :)
 
   Səhifəmi bu qədər zaman sonra yenidən görmək uzun səyahətdən sonra doğma evimə qayıtmaq kimi oldu :) .Evdə heçbir dəyişiklik yoxdur,dəyişən sən və baxış bucağındır.


    Önsöz bölümümü bitirirəm.Növbəti hissədə görüşərik.:)
   

 


    

Last King Of Scotland - Şotlandiyanın Sonuncu Kralı (2006)

     

"Bura Afrikadır.Şiddətə şiddətlə cavab verməlisən.Yoxsa öləcəksən."

     Son zamanlar  filmlərin əksəriyyəti tarixi hadisələr,gerçək olaylar,bioqrafiyalar üzərinə çəkilir. Elə 2015ci ildə filmlərin bir çoxu bu janrlarda idi və 2016cı ilin oscarını götürən filmi də  Katolik kilsələrinin uşaq istismarlarından bəhs edən Spotlgiht filmi oldu.Film haqqında daha ətraflı başqa bir postda yazmağı düşünürəm.

      Bu gün isə  bioqrafiyalara maraq saldığım vaxtlarda izlədiyim  Ugandalı İdi Aminin diktatorluğu dövründəki hadisələr əsasında çəkilmiş "Last king of Scotland" filmindən danışacağam.

     Tibb Universitetindən yeni məzun olmuş şotlandiyalı gənc  Nikolas Garrigan yeni macəralar yaşamaq, öz həkimlik təcrübəsinə başlamaq üçün Uqandaya yola düşür.Uqandaya gəldiyi qısa müddətdən sonra qəza nəticəsində ölkənin başçısı İdi Aminlə tanış olur.Şotlandiyaya qarşı xüsusi sevgisi olan və gənc həkimin xarakterindən təsirlənən İdi Amin, Nikolasa onun şəxsi həkimi olmağı təklif edir və beləliklə Nikolas təklifi qəbul edərək özünün də təsəvvür etmədiyi dövlət məsələlərinin içinə düşür.İlk zamanlar bu cür vəziyyət xoş olsa da daha sonra Nikolas özü də bilmədən  hakimiyyətin yaratdığı cinayətlərin ortağına çevrilir.Və burdan geri qayıtmaq  heç də asan deyil.

     

     Filmdə Afrikaya,hakimiyyət oyunlarına,insanların acınacaqlı həyatına avropalı birinin gözü ilə baxırıq və onunla birlikdə baş verənləri zamanla dərk edirik.

      Nikolas Garrigan xarakteri filmə Giles Fondanın romanından uyğunlaşdırılmışdır.Ancaq bu obrazı yaradarkən yazıçının ilham aldığı Robert Bop Astles adlı gerçək biri həqiqətən də var imiş.

      Filmin sonunda Nikolas özünü xilas edə bilir,tamaşaçı buna sevinir bəlkə də amma bu, hakimiyyətin,diktatorluğun orda hələ də canlar aldığı,insanları istismar etdiyi gerçəyini dəyişmir.Və biz də Nikolasla birlikdə təyyarədən Uganda torpaqlarına son bir dəfə baxırıq.

      Rejissor gerçək hadisələrin işığında, uydurulmuş ssenari ilə bizə tam olaraq İdi Amin və hakimiyyəti haqqında fikir verməsə də filmdən sonra mütləq araşdırmaq istəyi yaradır.

     Film bitdikdən sonra yadda qalan  Forest Whitakerin mükəmməl aktyorluq ifası ona elə həmin ilin oskarını gətirib.Film bir çox kinofestivallarda da mükafatlarını alıb.

 -"Qorxusunu göstərən bir adam zəifdir və kölədir."

-"Ölməkdən qorxursunuzsa, qorumağa dəyər bir həyatınız var deməkdir."

-"Ölməlisən amma ölməyəcəksən.Yoxsa burda baş verənləri dünyaya izah edə bilməzsən .Sənə inanacaqlar çünki sən ağ dərilisən."

   Bioqrafiya və tarixi sevirsinizsə mütləq izləyin.

  İMDB 7,7/10